Քվանտային նյութերի և նանոֆոտոնիկայի լաբորատորիա
Լաբորատորիան կազմավորվել է 2022թ․ hուլիսին:
Աշխատակիցների ընդհանուր թիվը 15 է, այդ թվում` գիտությունների թեկնածու` 7, ասպիրանտուրայի ուսանող՝ 2, մագիստրատուրայի ուսանող՝ 4, բակալավրի ուսանող՝ 2։
Քվանտային նյութերի և նանոֆոտոնիկայի լաբորատորիան մասնագիտացված է կիսահաղորդչային քվանտային կետերի օպտիկական հատկությունների հետազոտության մեջ՝ կենտրոնանալով հատկապես լույսի հետ նանոկառուցվածքների փոխազդեցության վրա: Լաբորատորիան հայտնի է քվանտային կետերի տարբեր տեսակների համապարփակ ուսումնասիրությամբ՝ առանձնահատուկ շեշտադրմամբ բարդ երկրաչափություններ ունեցողների վրա: Քվանտային կետերի այս եզակի տեսակները նոր ուղիներ են բացում էլեկտրոնային և օպտիկական հատկությունների օգտագործման համար՝ ճանապարհ հարթելով քվանտային հաշվարկների, ֆոտովոլտաիկայի և կենսաբժշկության մեջ բեկումնային առաջընթացների համար: Օգտագործելով այս քվանտային կետերի առանձնահատկությունները՝ լաբորատորիան նպատակ ունի բացահայտել նոր երևույթներ ու կիրառություններ ֆոտոնիկայում:
Փորձարարական հետազոտությունները հիմնականու նվիրված են քվանտային կետ - հեղուկ բյուրեղներ կոմպոզիտ նյութեր ստեղծելուն և դրանց հատկությունների հետազոտությանը, մասնավորապես՝ օպտոէլեկտրոնային, մագնիսական և ջերմային հատկությունների հետազոտման և զարգացման վրա։
Մեր հետազոտությունների հիմքն է կիսահաղորդչային քվանտային կետերի և հեղուկ բյուրեղների մոլեկուլների միջև բարդ փոխազդեցությունները։ Մեր խնդիրն է ատոմական մեթոդների միջոցով, ինչպիսին է խտության ֆունկցիոնալի տեսությունը (ԽՖՏ) հասկանալ այդ բարդ փոխազդեցությունները նանո մասշտաբների դեպքում։ Ուսումնասիրելով նշված փոխազդեցությունները մենք ձգտում ենք բացահայտել հեղուկ բյուրեղների ներսում գտնվող քվանտային կետերի վարքը։ Օգտագործելով նորարարական հաշվարկային և փորձարարական մեթոդներ, մենք դիտարկում ենք համակարգի ազատ էներգիան, պատկերացում կազմելով դրա կայունության և թերմոդինամիկ հատկությունների մասին։ Այդ ամենից զատ մենք գնահատում ենք այդ համակարգերի կլանման հատկությունները, ուսումնասիրելով դրանց ներուժը նորագույն օպտոէլեկտրոնային սարքերի համար։
