Արագագործ ջերմաստիճանային սկաներ (HSTS-1,2,3)

Արագագործ ջերմաստիճանային սկաներ (HSTS-1,2,3) հետազոտական սարքերը նախատեսված են փոշեխառնուրդներում ընթացող պինդ-ֆազային էկզոթերմ քիմիական ռեակցիաների կինետիկայի և մեխանիզմի ուսումնասիրություն-ների համար՝ արագ տաքացման պայմաններում: HSTS-1 և HSTS-2 մոդելների աշխատանքի սկզբունքը հիմնված է մետաղական բարակ թիթեղից (Ni) պատրաստված տաքացվող բջջի ուղղակի ռեզիստիվ տաքացման վրա։ Իսկ HSTS-3 մոդելի դեպքում գլանաձև հաբի տեսքով փորձանմուշը տեղադրվում է գրաֆիտի գործվածքից պատրաստված տաքացուցիչի մեջ: Տաքացուցչի տաքացումը իրականացվում է էլեկտրական հոսանքով նախապես որոշված-ծրագրավորված ջերմաստիճան-ժամանակ հետագծով, որը կարգավորվում է համակարգչով: Սարքը բաղկացած է երեք հիմնական մասից – ղեկավարման բլոկից՝ ներառյալ ուժային մոդուլները, ռեակտորից և համակարգչից: Հետազոտվող նմուշի տաքացման ժամանակ գրանցված թերմոգրամի՝ գծային ընթացքից դիտվող շեղումները մեկնաբանվում են որպես ռեակցիոն խառնուրդում տեղի ունեցող էկզո- և էնդոթերմ էֆեկտներով պայմանավորված պրոցեսներ։ Տաքացման ջերմային կորերից հնարավոր է որոշել ռեակցիայի բնութագրական ջերմաստիճանները, այն է ռեակցիայի սկսելու ջերմաստիճանը (To), բարձր ջերմանջատիչ փոխազդեցությանը համապատասխանող պիկի առավելագույն ջերմաստիճանը (Tmax) և գծային տաքացման ջերմաստիճանը (T*), որին համապատասխանում է ջերմանջատիչ փոխազդեցության առավելագույն ջերմաստիճանը:
Սարքը հնարավորություն է տալիս նախօրոք տրված պահին կամ ջերմաստիճանում պրոցեսն ընդհատել հզորության ավտոմատ անջատմամբ, սառեցնել նմուշը բարձր արագությամբ՝ գործնականում բացառելով հետագա փոխազդեցությունները: